[Inihayag sa sa Bocaue, Bulacan,
noong ika-21 ng Hulyo 2014]
Magandang umaga po sa inyong lahat.
Tinuro po sa akin ng aking ama, na ‘pag nagtatalumpati, may
kausap, tignan daw po sa mata. Pero talagang napakalawak po ng ating kailangang
titigan ngayon lalo na po ‘yong mga nasa taas ng balconahe. [Applause] Sana po
ay sa kasuluk-sulukan ay nagkakaintindihan pa rin tayo. Salamat po.
Binabati po natin ang lahat ng bumubuo ng Iglesia ni Cristo
[applause], sa pangunguna ng inyong Tagapamahalang Pangkalahatan na si Ka
Eduardo Manalo. Binabati ko po kayo sa nalalapit ninyong ika-100 anibersaryo.
Narito nga po tayo ngayon upang saksihan ang makasaysayan ninyong pagdiriwang,
na lalong nagbibigay-kulay sa inyong sentenaryo: ang paglulunsad ng Ciudad de
Victoria. Angkop nga po ang pangalan ng lugar na ito—na may kahulugang “Lungsod
ng Tagumpay”—lalo pa’t sinasalamin nito ang mga nakamit na tagumpay ng Iglesia
sa nagdaang siglo [applause]. Mula po sa pagkakatatag ng Kagalang-galang
Felix Manalo, hanggang sa patuloy na paglago ng inyo pong kongregasyon,
tinitingala ang Iglesia ni Cristo, hindi lang sa ating bansa, kundi maging sa
iba’t ibang panig ng daigdig. [Applause]
Talaga naman pong ikinalulugod ko ang pagkakataong maging bahagi
ng pagtitipong ito. Personal nga po nating sinusuportahan ang isang
institusyong tulad ng Iglesia sa maalab na paghubog ng inyong mga miyembro
bilang mga tapat na alagad ng ating Panginoon. [Applause] Nagsisilbi po kayong
tulay upang mapalalim pa ang pananampalataya ng inyong mga kasapi, at maigting
ninyong ginagabayan ang buhay ispiritwal ng napakarami nating kababayan.
[Applause]
Lubos po din tayong humahanga sa matibay ninyong pagsasamahan sa
Iglesia bilang isang pamilya at komunidad. [Applause] Malinaw po sa akin: Hindi
natatapos sa loob ng kapilya ang inyong pagbubuklod at pananampalataya. Hindi
kayo nakukuntento sa pangangasiwa sa araw ng pagsamba; dinadalaw din ninyo ang
inyong mga kaanib upang personal silang kamustahin [applause], at aktibo po
silang hikayatin na makilahok sa mga gawain ng komunidad. Sa paraang ito,
nababatid ninyo ang kanilang kalagayan at ang mga suliraning nakakaapekto sa
kanilang kilos at pasya; nagagabayan n’yo sila upang mapatibay ang kanilang
ugnayan sa kapwa, at ang pananalig sa Panginoon. [Applause]
Tunay pong isinasabuhay ninyo ang mga dakilang aral ni
Hesukristo. Ayon nga po sa Aklat ni Juan, Kabanata 13, Bersikulo 34 hanggang 35
[cheers and applause], nang magbigay ng bagong utos si Hesus sa kanyang mga
alagad, sabi po: Mag-ibigan kayo. Kung paanong inibig ko kayo, gayon din naman,
mag-ibigan kayo. [Applause] Kung kayo’y mag-ibigan, makikilala ng lahat na
kayo’y mga alagad ko. [Applause]
Nakasaad naman po sa Aklat ni Mateo, Kabanata 25, Bersikulo 40
[cheers and applause]. Alam ho n’yo po, napapag-isip ako, bakit mag
nag-quo-quote po ako sa bible [laughter], maski matagal ko nang kasamahan
parang, nabibigla ho. Anyway po, nakasulat nga po: Anuman ang ginawa ninyo sa
isa sa pinakahamak na kapatid ko, ginawa ninyo ito sa akin. [Applause]
Kongkretong patunay nga po ang paglulunsad ng Ciudad de Victoria
sa diwa ng pagkakaisang nangingibabaw sa Iglesia ni Cristo. Naipatayo ito mula
sa buong-pusong paghahandog ng inyong mga kasapi, kaakibat ang hangaring
makatulong sa mabubuting gawain at misyon ng Iglesia. Patunay din po ito sa
tayog ng mithiing kayang maabot ng mga Pilipino, at sa kakayahan nating
makipagsabayan sa buong mundo. [Applause]
Nandito nga po tayo sa strukturang inaabangan na ng lahat—ang
Philippine Arena, na kikilalaning pinakamalaking dome arena sa buong mundo.
[Applause] Tunay nga pong pambihira: Sa kapasidad na kasya ang 55,000 katao,
higit raw sa doble ang laki nito kaysa Staples Center sa Los Angeles,
California. [Applause]
Pero batid nating itinayo ang strukturang ito, hindi para
makipagpaligsahan. Ipinagawa ito para sa banal at dakilang layuning noon pa man
ay pinangarap na ni Ka Eraño Manalo [applause]—ang magtaguyod ng espasyo upang
maglingkod at ibahagi ang biyaya ng Panginoon sa lokal at pandaigdigang
komunidad. [Applause]
Bukod sa Philippine Arena, nasasabik din tayo sa uusbong ditong
iba pang pasilidad na maghahatid ng benepisyo, hindi lang para sa mga kaanib ng
kongregasyon, kundi pati na rin sa lahat ng ating kababayan. Taos-puso po
tayong nagpapasalamat sa Iglesia ni Cristo sa pagmamalasakit ninyo sa ating
kapwa; tunay pong [applause] ipinapamalas po ninyo ito, hindi lang sa salita,
kundi sa gawa. [Applause] Maraming salamat po sa pagiging kabalikat ng ating
administrasyon sa pagsusulong ng mabuting pamamahala.
Sa pag-aambagan nga po ng sambayanang Pilipino, nagbukal ang
tinatamasa nating malawakang transpormasyon sa ating lipunan. At sa trabaho po
nating ito ng pagsusulong ng reporma, hindi maiiwasan na mayroon tayong
makakaaway. Mayroon pong iilan na anuman ang gawin ko, gaya ng pagdalo rito, ay
maghahanap pa rin ng puwedeng ibatikos. Paalala ko lang sa kanila: Kung kapwa
ko Kristiyano, tungkulin nating magmahalan sa ngalan ng Panginoon [applause],
sa halip na maghasik ng agam-agam at ‘di-pagkakaunawaan. Bilang mga tagasunod
ng Panginoon, lagi sana tayong magtulungan sa pagtataguyod ng ikabubuti ng
lahat; lagi sana tayong maging bukal ng pag-asa at paglingap sa ating kapwa,
lalo na sa mas nangangailangan.
Muli po, maligayang pagdiriwang po sa Iglesia ni Cristo. Nawa’y
patuloy kayong maghatid ng positibong ambag at mabuting impluwensiya sa
sambayanang Pilipino [applause]; pagpalain pa sana kayo ng Diyos ng marami pang
biyaya at tagumpay hanggang sa susunod na daantaon.
Muli po: Magandang umaga sa inyong lahat at maraming salamat po.
Source: http://www.gov.ph/2014/07/21/speech-of-president-aquino-at-the-inauguration-of-ciudad-de-victoria/
